Monthly Archives: July 2018

新聞快打 – 二零一八年七月二十六日

各位好,又係新聞快打嘅時間!今個星期又有大批新料喇! 京都梅小路公園係京都鐵路博物館同同京都水族館嘅所在地,係一家大細玩一日嘅好去處,同埋鐵仔鐵女嘅朝聖地。之但係由京都火車站行過去只可以麻煩嚟形容(上個月去嘅時候計埋搵路行咗十五分鐘),所以喺京都市商、政各方推動同埋JR西日本合作下,決定喺嵯峨野線上加一個新站,2016年已動工興建,下年完工。上星期JR公佈經公眾投票決定嘅站名,定名為梅小路京都西站。車站嘅位置喺梅小路公園嘅巴士站對出(近京都鐵路博物館正門),相信啟用後去博物館嘅行程會舒服好多。 (JR西日本新聞稿:http://www.westjr.co.jp/press/article/2018/07/page_12734.html) 講開京都,喺嗰邊如果夜晚想消暑,喺京都站一個街口外嘅崇仁新町(官網:http://sujin-shinmachi.com/)會係你嘅好去處。平日由下晝五點到十一點,週末紅日三點就開,有酒飲有嘢食,重會有表演睇! 表演日日都有,家陣介紹一個喺東京嘅。Tokyo Metro旗下嘅文化推廣機構Metro文化財團,呢幾年都有喺夏季搞啲免費音樂會,今年亦唔例外,會係八月一日(下星期三)喺渋谷站內近13號出口舉行,一共兩節,由色士風組合Five by Five(https://www.five-by-five.tokyo/)擔綱演出,預定會吹奏演繹韓德爾、莫札特、羅西尼、韋華第多首古典名曲。(新聞稿:http://www.metrocf.or.jp/culture/2018/concert_st180801.html) 影相好去處:奈良嘅春日大社(http://www.kasugataisha.or.jp/index.html)嘅石燈籠出咗名多,亦係世界遺產。日頭去影相已經靚,有冇諗過夜晚都可以去?家陣機會嚟喇,因為每年嘅二月三日同八月十四、十五日,春日大社都會舉行名為萬燈籠嘅夜間點燈祭典,日本國家旅遊局都有介紹(官網link:https://welcome2japan.hk/attractions/event/traditionalevents/february/a09_fes_setsubun.html),不過佢哋講嘅係二月嘅節分萬燈籠)。八月嘅叫做中元萬燈籠,Travel.jp嘅呢篇(https://www.travel.co.jp/guide/article/33758/)有頗多相片可以參考。下個月喺關西嘅影友不妨考慮下。入場費500円,開放時間係晚上七點至九點半。 八卦料:東京市政府早排訪問咗大約一萬三千名外國遊客,發現佢哋喺東京流連嘅地區會因為國籍而有所不同。例如歐美遊客喜歡渋谷,台灣人就去淺草體驗下町風情。東南亞、韓、香港遊客鐘情新宿,大陸同俄羅斯人就去銀座駛錢。最奇嘅係印度人獨愛秋葉原,可能係去買貨同睇IT嘢都唔定。東京市政府希望調查會顯示名國遊客嘅喜好,從而進一步提供、配合佢哋嘅需要。(Japan News報導:http://www.the-japan-news.com/news/article/0004576569) 今個禮拜講到呢度,下次再見!

Posted in 交通, 文化, 新聞, 日本, 景點, 飲飲食食 | Leave a comment

新聞快打 – 二零一八年七月六日

http://www.5dwalk.net/wp-content/uploads/2018/07/2018-06-24-10.39.01-1024x768.jpg

新聞快打又返嚟啦!上星期過咗日本一轉,返嚟又有一堆新料喇! 以沖繩、北海道為據點嘅渡假酒店集團Hotel WBF會喺下星期二(七月十日)登陸首都圈 ,東京第一號店會喺淺草開張。淺草所在嘅台東區,住宿一向係民宿、hostel同business hotel為主,今次WBF集團加入,選址重要揀喺淺草寺正後方,走線明顯係想去拜神但又唔想捱hostel嘅一群。(官網) 講到台東區,每年夏天喺區內嘅隅田川都會有煙花大會,今年就會喺七月廿八號晚舉行(如有天雨,會延期一日)。為應付當日嘅人流,Tokyo Metro宣佈銀座線當日會加開六十三班列車。 無口貓Hello Kitty新幹線終於喺上星期六(六月三十日)開車喇!車體係將已停駛嘅EVA新幹線改裝而成,每日由博多及新大阪各開一班。同EVA新幹線唔同,一号車卡展覽室Hello Plaza不需預約,介紹西日本各地嘅風土民情,二号車卡就係Kawaii! Room,全卡係Hello Kitty獨格裝飾,亦係自由席,大家可以隨便入去影下相打下咭。喺博多站嘅商店已經更新成為Hello Kitty 新幹線Marche,已經開幕。另外,各式商品亦已經車內及指定鋪頭發售。票價方面,同山陽新幹線嘅其他列車一樣,有JR 西日本包括新幹線嘅pass就可以搭。 JR東日本嘅鐵路博物館經過改建後,今個星期正式重開。開幕當然有新展品,而今期嘅展品實在令人期待,包括現役東北新幹線 隼嘅原大模型、今年三月退役嘅雙層新幹線 E1 Max真車、同埋五年前退役嘅山形新幹線 400系真車。400系列車可以上車參觀。 鐘意去祭典、下星期會去福岡嘅朋友就要留意喇!下星期四、五同星期日,喺博多嘅櫛田神社將會舉行一年一度嘅博多祇園山笠,一個週末有三個大型山笠(花車)巡遊。呢個祭典自1241開始每年舉行,從未停止,今年已經係第七百七十七次,係福岡三大祭典之一。兩年前被聯合國教育科學文化組織列入世界遺產名錄,歷史、娛樂價值並重。 今個禮拜嘅新聞快打喺度就告一段落喇!大家覺得今日嘅新聞有用嗎?有冇意見想講下呢?留個言一齊討論下吖!下星期再見~

Posted in 交通 | Leave a comment