今個星期嘅新聞快打又嚟喇!今次嘅交通消息比較多,不過其他新聞一樣齊全!
- 七月大雨災沖壞咗唔少喺日本西部嘅鐵路基建,各鐵路公司都一直忙於搶修。今個星期總算有好消息,繼JR四國宣佈來往高松同松山嘅予讚線修理完成,今日(9/1)重開之外,JR西日本亦更新廣島周邊嘅維修進度,其中以吳線廣島去吳市段九月九日恢復運作,特別值得留意。因為吳市除咗係去松山嘅渡頭之外,更係一眾艦娘粉嘅朝聖地之一,大和博物館、入船山紀念館 (前身為吳鎮守府司令長官官邸) 都喺市內,火車開返落去就方便返晒。吳線其他路段要最遲下年一月先全線再通車。山陽本線各段則喺九月內陸續重開。
- 日本捷星喺八月廿九日公布業績,連續三年有錢賺。發佈會同時公布正在籌備東京同關西去四國高知嘅返鄉下路線,應該係嘗試單挑長途巴士嘅優勢。
- 我諗大家都可能用過JR東日本嘅JR‐EAST Train Reservation去訂東北同北陸新幹線嘅指定席。以後睇嚟會有更多機會用得著呢個網上服務,因為JR東日本宣佈喺九月擴大服務範圍,以遊客導向嘅Joyful Trains系列為主。例如東北常見嘅SL蒸氣火車,觀光列車及主題列車如Pokémon With You等。九月五日開始可以訂購新加入嘅列車車票。
- 近期氣勢如虹嘅行李暫托服務ecbo cloak本星期宣佈進軍名古屋地區,初步會有漫畫茶室同手機鋪打頭陣。而開發名古屋地區業務嘅契機,竟然係因為成為今年國際cosplay高峰會嘅大會行李暫托供應商?
- 築地場內市場搬遷已成定局,小池知事一錘定音決定豐州新市場十月十一日開幕,築地場內市場則係十月七日起停止運作。為咗準備搬遷,九月十六日開始呑拿魚拍賣參觀取消,青果市場參觀亦會喺九月三十日停止。至於場外市場,就一如以往我哋嘅報導所指,係唔會搬嘅,佢哋重搞緊投票,以決定係保留原名定係改新名。不過,一定此情不再嘅,似乎就係住喺附近,再披星戴月行過去築地,等壽司大 (或者大和壽司,隨便你) 開鋪,壽司做早餐嘅豪氣。
- Bonus: 謎の看板 727,火車模型迷必入情景?
暫時告一段落,下星期再見!