新聞快打 – 二零⼀九年二月十五日

又係新聞快打嘅時間,大家好!今個禮拜:芦之湖海盗船有更新、參觀貴到飛起嘅Twilight Express瑞風、自販機都有得差電?

  • 箱根海盗船更新,蘆之湖女皇登場:遊箱根,一般都會去蘆之湖搭下海盗船遊河。家陣喺蘆之湖有三隻船,最耐嗰隻九一年落水,都係時候要退役。上星期,新船蘆之湖女皇已經行咗下水禮,預料會喺四月就航。大家復活節過去箱根,就可以試搭新船啦!
  • [攝影好去處] 舊岩崎邸庭園:喺東京,除咗食買玩之外,影相都有不少好去處,呢次介紹嘅舊岩崎邸庭園就係一個好例子。原址係三菱財閥嘅家族住宅嘅一部分,由第三代承繼人岩崎久弥興建西式住宅、日式大宅及桌球室,二戰後曾係美國佔領總部(GHQ)轄下特務機關Canon Unit嘅總部,後來歸還日本政府,收歸國有。到零三年經過維修復原後對公眾開放。庭園同建築都甚具歷史意義,觀賞價值亦高。攝影發燒友不妨考慮去影下相~
  • 自販機幫你手機打打氣?:喺日本,自販機就周圍都有,由煙、飲品、杯麵到關東煮都有得賣。未來,可能手機無電都會搵自販機幫手。日本其中一間自販機公司Dydo就正喺東京都內十個地點試驗裝置手機充電嘅自販機。充電器可以提供俾一部手機或平板以5V輸出快速充電五分鐘,目標在幫差唔多無電嘅流動裝置頂住一陣,等用家打電話、搵地圖。試驗期內免費,至於如果推出時每次充電要收幾錢就未知。
  • 阪急京train更新,三月廿三日開車:阪急京都線近年有一架叫京train嘅平民價觀光特急列車(無需特急費),行走阪急梅田至阪急河原町。阪急為咗進一步宣傳京都,裝會推出全新車廂版,更名為京train雅洛,下個月廿三日就會投入服務。六卡車廂,每卡都有唔同設計,強調表達京都四時之美。下個月去京都睇花時,不妨去試下!
  • Twilight Express瑞風試車:瑞風作JR西日本嘅王牌豪華觀光列車,樣樣都極盡豪華(當然個價都超豪,每人五十萬円起跳,最貴套房要一百二十萬円一位)。雖然如此,瑞風仍然大受歡迎,經營未到兩年,已經有超過三千人乘搭。早兩個禮拜,JR西日本就舉行咗一個傳媒試坐,等讀者無得坐都有得睇下有幾豪華。睇落,想坐都係要儲下錢先。

今個星期就到呢度,下星期再見!

About 菲力士

旅遊歷近三十年,真正自由行從零五年開始。近年多去日本,關西專門。
This entry was posted in 交通, 新聞, 日本, 景點, 火車, 通訊 and tagged , , , , , . Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.