又係新聞快打嘅時間喇！行李唔駛要你煩，咖啡室有得瞓覺，找換機都有實測？
- ecbo cloak繼續擴展：ecbo cloak近期十分活躍，繼同JR合作之外，家陣又同九州嘅大手私鐵西日本鐵道合作，喺西鐵福岡站嘅出租會議中心「SPACE on the station」中設立行李儲存點，收費每件700円，儲存時間長至十日。
- JR九州X大和運輸，行李直送由布院溫泉：講起行李，有時去溫泉鄉最大問題係行李（所以自駕係一個好嘅選擇）。但如果可以唔駛理行李而一樣可以輕鬆去溫泉？點計都似乎抵過自駕噃。JR九州呢期就積極試驗呢個可能性，繼喺別府提供免費行李搬運外（需要喺JR九州訂票網預定車票），再推出新服務，幫旅客搬運行李往返福岡機場、JR博多站與由布院溫泉各旅館。服務由大和運輸經營(即日起至五月三十一日)，機場同博多站方面每日十一點半cutoff，當日六點送到酒店。由布院方面就十一點cutoff，下晝三點打後可以喺機場、博多站攞返行李。每件收費由一千八百円起跳，大啲嘅就收2030円。相信如果反應良好，未來可能喺其他地方都會有得用都唔定。
- PASMO同西瓜爭相出有時限IC card：唔知係咪奧運效應，PASMO（即係首都圈內各私鐵合營嘅IC card機構）同JR東日本都會喺今年九月推出有期限嘅IC card俾外國旅客使用。PASMO嗰張以無咀貓等Sanrio人物設計，而西瓜嗰張則係日之丸加櫻花圖案，對象明顯不同。另外PASMO唔駛按金而西瓜要收，但西瓜可以選擇開咭金額，PASMO則無得揀，入二千円實際可用金額千五，手續費五百円。相同嘅係可增值、搭車買嘢都用得、開咭廿八日內有效、餘額無得退回等。啱唔啱駛，就真係見仁見智，特別係一般IC card有效期係十年，而呢兩張得廿八日，除非以後都唔去日本，買一張超短有效期嘅，似乎有啲浪費。
- 雀巢搞瞓覺咖啡室？：喺咖啡室補眠，相信你未試過都會見過。但真係瞓一覺又會係點？想試就要喺三月六號起，去大手町雀巢旗艦店嘅睡眠cafe啦。店內有可平躺嘅梳化同床選擇，完全個室睡眠，光暗、背景音樂都可以選擇。時間由半個到三個鐘頭選擇，入場費包一至兩杯咖啡，最低消費750円（包一杯咖啡）。原來上年已經搞過一次期間限定嘅popup鋪，今次就開實鋪。每日朝九晚六，必須預約，三月一日開始接受booking。
- Pocket Change找換機實測：之前有介紹過嘅Pocket Change，終於有日本人去試喇。結果係：銀紙同散銀都收嘅貨幣有美金、歐羅、韓圜、円同埋人民幣，港幣、新台幣、泰銖、越南盾同埋新加坡元就只收紙幣。可以攞現金，亦可以入落各種電子貨幣户口，例如IC咭、樂天Edy、iTunes、Amazon、七仔Nanaco等。
今個星期又告一段落，祝各位週末愉快，下星期再見！
