又係每週一次嘅新聞快打嘅時間啦！櫻花重有唔到一個月就開，大家有無準備飛返一轉呢？
- 小田急引入翻譯機：小田急電鐵今個禮拜開始引入早排報導過嘅手提翻譯機Pocketalk，給予全部七十個車站內嘅職員配備。用意當然係為咗站員同外國旅客嘅溝通順暢啲啦。現時預計到四月全部站都會有職員配備翻譯機。
- 富士回遊公布班次詳情：由JR東日本同富士急合營嘅富士回遊線三月十六日通車，亦已公布行車安排。用以取代現時喺週末、假期行走嘅Narita Express特別班次，以後每日都有兩班特急車來往新宿到河口湖站，亦比以前嘅班次快半個鐘，達至兩小時內嘅車程。留意嘅係雖然喺新宿開車時係全車指定席嘅，但因為有部分路程（大月至河口湖）係富士急行線嘅部分，所以該段係全席變成自由席。特急券大人一千六百円，小童九百円，富士急行段分別係六百円／四百円。
- 埼玉鐵路博物館新幹線駕駛室參觀 ：新幹線戰士fans有福啦！埼玉市嘅鐵路博物館會喺三月九日至四月八日舉行與新幹線戰士有關嘅展覽，除咗有新作4D影片之外，重有參觀200系／400系新幹線嘅駕駛室！駕駛室參觀全部係星期六、日、公眾假期舉行，要去就要plan定喇。
- 辻利兵衛本店關西機場開鋪 ：喺日本頗具盛名嘅茶商「辻利兵衛本店」已喺今日於關西機場開設cafe。呢間鋪係「辻利兵衛本店」嘅首間機場分店，提供抹茶、甜品及麵食。Cafe位於一號客運大樓三樓入閘後部分，營業時間係每日早上七點至凌晨零時。唔知佢哋有無手信賣呢⋯⋯
- Tokyo Metro接受支付寶付款：Tokyo Metro已經喺上星期開始接受用支付寶買週遊票。對應嘅站有銀座、新宿、表參道同東京站，加埋上年已經試行嘅上野站，總共五個站參與。乘客可以喺遊客服務中心以支付寶購買Tokyo Subway Ticket及Greater Tokyo Pass嘅所有面額週遊票。
今個禮拜新聞就係咁多。大家會唔用支付寶買飛嗎？不妨留個言討論下？下星期再見！
