各位好，新聞快打返嚟喇！今個星期有京都新聞，唔睇櫻花有乜睇？又或者唔喺大城市睇櫻花有乜好去處？同埋大膠囊酒店新玩法！
- 唔睇櫻花睇杏花：常去日本嘅旅人，怕且點都會睇過櫻花。想搵啲新意？可以睇第二啲花。長野県千曲市每年都有大批杏樹同櫻花爭妍鬥麗，當地會喺花期舉行賞杏祭，去一處睇到兩種花色，都會係幾特別嘅景緻。今年花祭喺三月三十到四月十四日，月尾到復活節假都會睇到。去千曲，要搭新幹線喺長野轉當地私鐵，全程兩個鐘，比較適合day trip或者長野嘅excursion。
- 松本賞櫻：如果你都係想賞櫻，但又唔想迫，長野重有地方可以試下，就係松本。松本城與姫路、彥根等國寶級名城並列五大，櫻花景色更係絕美，又有夜櫻，亦喺長野、千曲附近，可以包埋一個行程行晒！今年長野県預計櫻花會係四月第一、二星期開花，所以都啱復活節假期出遊。
- 京都火車博物館展出玩具火車？：原來今年係Tomy嘅電動玩具火車Plarail嘅六十歲生辰。京都火車博物館會喺三月九日至五月七日Plarail展覽以示慶祝。展覽會展出由初代到現在嘅電動火車，並有一個七米X一點八米嘅大型情景，裏面重有一個兩米高嘅路軌塔，淨係聽到都覺得壯觀！
- 京都市巴士轉前上後落：坐過日本巴士嘅人，相信都會留意到佢哋係習慣後面門上車，前面落車嘅。京都市巴士就準備一改慣例。三月十六日開始，市巴士100號（來往JR京都站、東山、平安神宮及銀閣寺）及大節日行走嘅東山穿梭巴士（來往JR京都站、五条坂、烏丸五条及烏丸七条），試行車頭上車，車尾落車（輪椅除外）。去京都嘅朋友就要留意喇。
- 大膠囊酒店玩茶道設計？（唔係廣告）：近年，喺訪日旅客與日俱增嘅現狀下，簡易宿所如膠囊酒店開始轉型，唔再以最少空間放最多嘅人為目標。由First Cabin帶領嘅大capsule，越開越多，開始進攻旅遊市場。喺云云最新參戰嘅酒店中，下個月喺東京日本橋開業嘅 hotel zen tokyo 就嘗試以設計理念取勝，強調禪意，號稱係「住得嘅茶室」（註：茶室嘅茶指日本茶道）。男女分層、共用浴廁、樓底高度如正常酒店房，以門簾代替實門等常見手法，喺呢度一樣通用。但更特別嘅係最貴嘅房除咗最大之外，重係．有窗．㗎！XD 查過價錢，五月嘅房由最平嘅六千円到一萬二千円，唔算平，但新酒店靚設計加地點適中（Tokyo Metro人形町站出口對面），都係可以一試嘅選擇。
今個星期到呢度。大家會去日本賞花嗎？有無心水必睇景點？歡迎喺留言討論一下。下星期再見！
