又係新聞快打嘅啦!今個禮拜好多航空類嘅新聞,重有尾道JR站改建完成,去水户睇梅花尾水。
- 日航開廉航:今個星期最爆應該係呢單。JAL嘅廉航將會叫做ZIPAIR Tokyo,首航會喺二零二零年夏天,開兩條綫來往成田機場及曼谷/首爾,未來計劃開辦美國本土至東京嘅廉航綫,將會成為首家橫跨太平洋嘅廉航公司。
- 京成Tokyo Shuttle取消成田機場去東京網上預訂:京成Tokyo Shuttle一直因爲網上訂位有折扣,比JR嘅The Access成田平一百円,所以就算喺東京同銀座嘅站位置唔算最方便,都仍然有市場。但因為廉航客量與日俱增,網上預訂鎖死咗頗多嘅座位,令walk-in客等候時間大大增加。所以,京成襯今個月更新班次(將第三航厦站提前至第一站,然後再停第二、第一航厦),同時停止成田機場至東京嘅網上預訂及折扣。當然,亦可能係反應太熱烈,引發京成唔減價賺多啲,不過真相就真係不得而知啦。
- 小田急接受特急列車網上訂票:呢邊唔受網上訂票,嗰邊小田急就開始接受特急券網上訂購。可訂購嘅特急列車包括Romancecar及「富士山」,重要唔駛開户口!
- JR西日本代訂驛便當:講起網上訂購,家陣搭山陽新幹線book咗指定席,就可以預訂驛便當 (https://ekiben-deli.com/about/)。三日前可以預訂,有四十款便當揀,買夠一千円以上重有二百円嘅罐裝咖啡卷(優惠期由三月十七日至七月三十一日)!
- JR尾道站重建完成啟用:上年九月,我哋提過JR尾道站當時正在重建,雖然未能趕及喺上年完工,但總算喺上星期完成,同時啟用。同時開業嘅重有以單車客為主嘅hostel、商店,同埋Twilight Express瑞風嘅專用候車、登車設施(因為瑞風嘅班次部分會停尾道)。
- 去水户睇晚梅:今個週末喺東京,如果無乜特別嘢搞,其實去水户睇晚梅都係一個唔錯嘅選擇。由東京去水户,特急車個半鐘內就到。 位於水户嘅偕樂園,與金澤兼六園、岡山後樂園齊名,亦係賞梅名所,今個星期花開咗八成,但仍然值得去睇下過千棵梅樹形成嘅景色。
- 大阪區機場巴士推免費Wi-Fi:Wi-Fi供應商Wired and Wireless會喺大阪地區嘅機場巴士(來往伊丹、關西國際與大阪市區)提供免費Wi-Fi。介面會有十四國語言選擇,服務一次可用三小時。
今個星期又告一段落,下星期再見!