新聞快打 – 二零⼀九年四月十二日

又係新聞快打嘅啦!幾個禮拜都喺plan行程、出發、影相中渡過,今個禮拜總算回魂喇!事不宜遲,睇新聞去也!

  • 無印酒店第三分店銀座開業:我諗大家對無印良品都唔會陌生。佢哋近年進軍酒店業,頭兩間喺北京同深圳。回歸原點,第三店終於喺上星期同銀座全球旗艦店一齊開幕。呢排咁多日本假期,睇嚟無乜機會入去住下,不過睇下內文嘅搶先報導,都應該可以止下咳嘅。
  • Hyatt進軍日本第一彈,千葉浦安一號店本週開張:唔講原來唔知,凱悦原來未有酒店喺日本。不過七月開始就有喇!Hyatt Place Tokyo Bay開喺千葉嘅浦安市,睇嚟唔就腳但其實喺東京廸士尼附近,行去JR新浦安站搭一個站就到,酒店地點又鄰近夏季浦安市花火大會嘅會場,睇嚟會成為煙花、廸士尼粉嘅必爭之地。今個星期開始接受訂房,有興趣嘅朋友睇嚟要快手啦。
  • 東京Monorail為應付十連休人潮,加開不停站快車:十連休威力驚人,羽田機場作為國內、外班機總匯之一,自然嚴陣以待。東京Monorail將會喺四月廿七至五月六日期間,每日將四十六班慢車改為只停羽田各客運大樓及浜松町站嘅「空港快速」班次,以疏導人流。
  • 福岡機場行得到嘅新酒店:五月三十日,View Hotel集團將會喺福岡機場附近開設專為夜機、早機客服務嘅新酒店。呢間「Grand View福岡機場酒店」嘅最大特色,就係距離機場只係八分鐘腳程,非常近便,最啱夜機到嘅旅客借宿一宵。

今個星期又告一段落,下星期再見!

About 菲力士

旅遊歷近三十年,真正自由行從零五年開始。近年多去日本,關西專門。
This entry was posted in 交通, 住宿, 新聞, 日本, 通訊 and tagged , , , , . Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.