又係新聞快打嘅時間啦!今個星期有Welcome SIM臨別秋波,奧運日本國內入場卷即將接受申請,JR西日本巴士引入雙層巴士,同埋酒店搞坐禪體驗。
- Welcome SIM同你説聲再見:好嘢唔長久,Welcome SIM都唔例外。Docomo宣布因為業務重組,決定喺九月三十一日後停止Welcome SIM嘅服務。同時,由現在至九月尾,Welcome SIM嘅有效期限會由150日減至90日。另外,喺六月十三日後發嘅新咭,將唔會有現在做緊嘅二十日額外有效期限優惠。
- 奧運國內入場券抽選五月接受申請:如題,國內抽選喺五月六日開始,六月中有結果。至於國外飛,香港係由中旅獨家代理,官網暫時未有資料,有興趣嘅朋友睇嚟要𥄫實。
- JR西日本巴士引入雙層巴:夜行巴士一般而言都係大時大節先會好爆,但熱門路線如京阪神-東京就比較滿。繼JR東日本巴士引入雙層巴之後,JR西日本巴士都唔執輸,投入四架Scania嘅雙層巴。先喺四月三十日平成最後一夜行走東京至大阪一段,並冠名為「平成Dream令和號」。之後喺五月下旬會正式行走京阪神-東京線夜行班次。
- 喺酒店學坐禪:京都酒店越嚟越多,雖然旺季都會爆滿,但淡季就競爭激烈,自然要諗下賣點。新酒店Enso Ango就除咗一般嘅酒吧、lounge、健身房之外,特登整個有榻榻米嘅道場,並禮聘建仁寺嘅副主持嚟教住客坐禪,號稱係日本第一個唔喺寺搞嘅坐禪體驗。玩到最底有新意,話唔定係一個全新體驗。
今個星期到呢度又告一段落啦。家陣我哋嘅姊妹網站traveljapanlocal.com開咗IG户口(https://instagram.com/traveljapanlocal),近期會分享小弟上個月尾京都迎櫻之旅嘅靚相,大家想睇就要follow返啦~ 下星期再見!