新聞快打 – 二零⼀九年五月十日

新聞快打又嚟啦!今個星期酒店料特多,週末好去處又有吉卜力展覽,米田共都有藝術館,Naked亦有新art show。詳情睇落去就知!

  • 酒店開完一間又一間:雖然開極都有,但旺季酒店繼續爆滿。大型酒店自然有市場,例如Oriental (Hotel Management Japan旗下網絡)就會喺博多站前開一間221間房嘅分店,係佢哋九州嘅首間分店。港人favorite之一嘅華盛頓亦會喺京都開一間十層嘅分店。另外,以關西為基地嘅Karaksa Hotels會喺嚟緊兩個月喺東京開兩間分店。除咗大型酒店之外,不少新酒店都強調experience,早兩星期提過嘅無印酒店就係一例。又例如Accors亦會喺京都開一間女性客專用嘅酒店,喺內裝、amenities、餐飲上完全滿足女性旅客嘅優雅氣質。Boutique系亦有新人加入,喺大阪正中心開一間十四間房嘅小酒店
  • 便便藝術館:日本人真係乜鬼都可以搞得一餐。Unko Museum Yokohama顧名思義,就係米田共博物館,有馬桶俾入場人士影相,波波池有高過人嘅便便(俾唔俾督嘅呢?),重有各式米田共藝術創作。啱唔啱睇就見仁見智,不過七月十五號就完,要睇就要快手啦。
  • 酒店借用手機可以訂棒球飛?:如果你住過外國酒店嘅,都可能會見過酒店有smartphone可以借用,一般除咗代替房內電話外,亦會提供當地旅遊資訊。家陣又可能多一個用途,就係買棒球飛。日本其中一家酒店手機供應商Hi Japan同九州嘅棒球隊福岡Softbank Hawks合作,利用Hi Japan嘅手機提供棒球觀戰攻略及購買棒球飛。
  • 週末好去處:本週末限定,神田明神有「鈴木敏夫與吉卜力」美術展,喺神社內嘅神田明神文化交流館咖啡室亦有期間限定menu,重有湯婆婆繪馬出售。吉卜力粉不妨去睇下~
  • NAKED古蹟crossover:上年楓期,媒體創作公司Naked喺二条城嘅多媒體創作fLOWERS開拓咗媒體show與古蹟嘅合作,今年佢哋再接再厲,近日會為道後温泉創作與手塚治虫嘅火之鳥crossover映象,以及為慶祝京都南座歌舞伎劇院復修完成嘅「京都未來祭2019」提供多媒體體驗。有時間又喺日本嘅朋友就唔好錯過啦!

今個禮拜新聞又告一段落。嚟緊嘅幾個月,大家會唔會出遊呢?會去邊度玩?不妨留個言同大家分享下~

About 菲力士

旅遊歷近三十年,真正自由行從零五年開始。近年多去日本,關西專門。
This entry was posted in 住宿, 文化, 新聞, 日本, 景點, 通訊 and tagged , , , , , , , , , . Bookmark the permalink.

Leave a Reply

Your email address will not be published.

This site uses Akismet to reduce spam. Learn how your comment data is processed.