又係新聞快打嘅時間啦!病咗個幾星期,總算回復狀態,又可以同大家分享下今個星期嘅新聞啦~
- 東京花火highlight:夏天到,又係日本放煙花嘅時節。呢篇文章提到三個喺七月尾同八月頭嘅花火大會,都係東京都內最大級嘅,其中千葉幕張同江戸川區係同日同時進行。
- JR東日本為Resort白神號列車加入免費WiFi:喺青森去津輕西海岸嘅溫泉,除咗揸車之外,通常都係搭JR東日本嘅Resort白神列車。由於車程全長五個鐘,想打咭但無網上都幾煩。JR東日本從善如流,由七月一號開始為Resort白神加入免費WiFi。用電郵地址登入,每次可用三小時,全日無限次登入。
- 京王更新AI車站情報機械人,加入多語文支援:呢期好多交通機構都試緊用AI機械人做流動詢問處,京王亦唔例外。佢哋嘅AI機械人三月起已經喺下北澤站啟用。由六月廿四號開始,呢個機械人加入咗中英韓語音詢問功能,唔知有幾幫到各地遊客呢?睇嚟要去試下先知喇。
- 酒店新聞: 大阪新歌舞伎座原址開新酒店,邀得隈研吾設計。 ANA夥拍洲際酒店集團喺別府開渡假村, 重有天橋立傍邊豪華露營。
今個星期又告一段落,下星期再見~