新聞快打 – 二零一八年九月二十日

又係新聞快打嘅時間,大家好!今個星期都有唔少便利旅客嘅好消息,由關西機場進一步回復正常,到七銀行(Seven Bank)嘅櫃員機新搞作,我哋為你一一網羅。 關西機場聯絡橋喺今個月嘅颱風被油輪撞毀後,鐵道部份損毀輕微。經搶修後,JR線及南海電鐵已經喺今個星期二(九月十八日)恢復正常班次。至於損傷較嚴重嘅汽車橋部份,因為訂製新橋桁需時,冬季海面情況亦不利大型工程,故此預計下年春季開始工程。目標係喺Golden Week前完成修理。車輛通行方面,機場巴士正常運作外,廿一日開始的士可以進出機場,租車則繼續禁止通行。 我諗大家都可能試過喺日本用晒現金,要去便利店嘅櫃員機攞錢。大家又有冇試過喺便利店想用西瓜買嘢,但張咭唔夠錢要增值,言語又唔通?家陣有個更好嘅辦法:JR東日本同七銀行合作,由十月十五日開始喺全日本嘅七銀行櫃員機推出IC咭增值服務。服務無需户口,現金交易,以千円為單位,每次最多入二萬円。喺七十一店內嘅櫃員機會廿四小時提供服務。喺七銀行嘅機,服務時間會跟分行開放時間。 尾道市係單車友嘅好去處,事關市內連接四國嘅島南海道係踩車來往四國嘅熱點。而即將喺年尾完成重建嘅JR尾道站,剛公布嘅店鋪名單就突顯JR西日本銳意發展單車旅遊嘅目標。名列第一嘅係以單車旅客為對象嘅hostel,同埋兼營單車租賃嘅咖啡室。另外重有以尾道文化為賣點嘅食店、咖啡館、土產店等。七十一亦會開設一間小型超市,並置有櫃員機、影印機。 JR快速巴士關東同西日本分社同時慶祝三十週年紀念,推出東海道大減價!日、夜班都有平,東京來往京阪神最低三千円有交易。使用期由十一月一日至十二日廿二日(十一月廿二日除外),兩個月前可以上網訂位。 星巴克上野公園店搞art fair?今個星期六到下星期一(即九月廿二至廿四日),星巴克上野公園店會開設藝術村,同時邀請來賓同本地藝術家合作創作大型併貼畫Art Tree,為畫作添上不同顏色嘅落葉。時間係每日早上十點至下午三點。 大家有冇準備好去日本睇紅葉?不妨分享下你嘅計劃?下星期再見!

Posted in 交通, 住宿, 文化, 新聞, 日本, 通訊 | Tagged , , , , , , , , | Leave a comment

新聞快打 – 二零一八年八月二十五日

http://www.5dwalk.net/wp-content/uploads/2018/08/IMG_1986-190x143.png

大家好,新聞快打又返嚟喇!呢期日本重係好熱,大家有無唔理三七廿一照飛可也呢?有嘅不妨留言同大家分享下日本熱成點吖! 據報香港快運因為香港去九州宮崎線錄得赤字,決定由十月二十八日起停飛。而同日香港至鹿兒島線將會加班,由每週五班加到每日一班,據稱係由宮崎線停飛多出嚟嘅飛機頂上。大家如果已經買咗十一月打後去宮崎嘅飛就要留意,因為香港快運官網係未有宣布嘅,予先做定兩手準備會安全啲。 JR巴士關東將會喺佢哋嘅東京至名古屋高速巴士線上引入雙層巴士,每日兩班,早班七點半由東京站出發,下午四點半由名古屋站回程。呢兩班睇嚟都係比較熱門嘅班次,轉用雙層巴士明顯有助疏導人流。之但係點解咁多人搭長途巴士呢?呢個就要留意之後嘅專題喇。(介紹:https://www.traicy.com/20180801-jrbk-astromega) 日本嘅火車、地鐵站常常會有各類型嘅表演、活動,我哋之前都有介紹過。但係,喺車站月台食餃子飲啤酒,你又試過未?由即日至九月五號,喺JR両國站就有得試喇!今次係JR東日本同味之素冷凍食品嘅合作,會喺両國站嘅三号月台舉行,自己落手落腳即整即食。官網有上年嘅相可供參考,睇落都幾正。(介紹:https://www.traicy.com/20180820-ryogokugyoza) 七十一喺日本開到通街都係就唔係新聞,不少地鐵站都會見到佢哋嘅鋪,同Kiosk/NewDays/Lawson/FamilyMart分庭抗禮。喺車站自販機就更加普遍,幾乎每個月台都有。但七仔嘅自販機你又見過未?今個月頭,七十一喺都營地下鐵三田線嘅巢鴨站裝咗一部佢哋嘅自販機,主要係販賣食品,例如三文治、飯團等。大家如果日後會經過巢鴨站嘅,不妨落去睇下、打個咭。(介紹:https://trafficnews.jp/post/81126) 今期嘅新聞就講到呢度,下次再見!

Posted in 交通, 新聞, 日本, 通訊, 飲飲食食 | Tagged , , , , , , , , , , , | Leave a comment