喺日本租pocket WiFi?

http://www.5dwalk.net/wp-content/uploads/2014/04/booking-300x41.jpg

皆さん、お元気ですか? また私です。 大家睇標題係咪覺得好奇怪呢? 今次同大家講下喺日本租pocket WiFi。 大家可能會話,唓~ 香港冇得租咩? 又可能會問,係咪平過係香港租先? 事實係香港有得租,而且係日本租每日租金連稅(4月1日開始日本消費稅已經加到8%喇)加上送料、返却料(運輸費)畀供應商運費大約只會平10到10幾蚊1日。 又唔係平好多,咁為乜要係日本租pocket WiFi啫? 其實講穿,只係因為我懶同貪快。 懶係我可以係出發前預訂,係預訂時寫上要求到貨日子同酒店地址,咁我去到酒店check in時就可以順手攞埋隻pocket WiFi上房。 (下午4點前落單,即日發送第二日收到) 之後set好晒所有要用嘅devices再check埋係咪可以上到網就可以施施然咁出街喇。唔駛約交收係咪好方便呢?仲有係如果你肯畀多少少錢咁你仲可以要求係機場嘅郵局攞,不過因為郵局嘅收工時間問題,我怕攞唔到所以一直冇選用。 跟住就係快啦,點為之快呢? 呢個快係指下載速度,大家可能已經知道,就算你有錢日日俾無限數據漫遊,但因為頻率問題,香港嘅4G手提電話去到日本最快亦只可以用3G,而呢加係香港可以租到嘅pocket WiFi速度最多去到75Mbps(有啲比較舊嘅只可以去到42Mbps),但其實係日本最新嘅pocket WiFi嘅下載速度已經係去到110Mbps。 我最初都冇特別為意,但當實際使用嘅時候就發現原來真係可以快咁多。 下載快咗同時,上載速度新型號比起舊型號速度上亦都係快咗嘅。 另外,提一提大家,除咗4G/LTE pocket WiFi外,係日本仲可以租到WiMAX嘅pocket WiFi。 但由於現階段WiMAX嘅覆蓋率問題,就算係市區都會有啲位置出現收唔到信號。除非你係想試新嘢,唔係嘅就可以不理。 咁用完要返香港點還呀,大部份供應商係送貨嘅時候夾埋一份速遞單係盒裏面,大家千萬唔好掉咗佢呀,因為還嘅時候就要用到。 大部份供應商都係用黑貓或者佐川宅急便,而大多數便利店都有代收,大家只要去到便利店放低再畀埋運費就攪掂。 送料,出貨收500円運費,還嘅時候攞去便利店,運費自己到時畀。 不過有啲供應商係會係收費中一次過收送料同返却料,如果係呢種嘅話佢係會跟埋一個速遞袋,放晒所有嘢入去之後攞去便利店或者放入郵筒就攪掂。 為乜係日本租pocket WiFi就講完喇,有興趣嘅朋友可以去下面唔同嘅official link睇下。 另外要提一提大家,日本都有同香港差唔多嘅公平使用條款。 唔好諗住要嚟streaming睇戲呀,唔係突然間用唔到咁就唔好啦,只要大家嘅使用量唔超過每日上限嘅話係唔會有問題。 最後要提醒大家係還之前記得义番電同小心使用,萬一整壞咗要罰錢就唔開心啦。 Official Link …

Posted in 日本 | Tagged , , , | 4 Comments